عهلیئهشرهف، هولهند
دوهشەممە, 19 JULY 2010 18:44 | 
| 
دما نامێ
ههڵای خهموو جه دهسداو، کاک غازی و کاک یۆسفی، ساڕێژ نهویهبێ، ههڵای ئیزامه قووڵه
جهرگبڕه، ئیکارهساته دڵ تهزێنه، جه ویرمان نهشیهبێوه. دڵتهنگیی و ئێشوئازار، دهرفهت و
دهرهتانوو ئاساییبیهو ئی کۆسه گهورهیشه پهی ناسێبێمێوه که، سێکوچکهو ئارگاو ڕۆشن
کهردهی ئۆجاخهو شێعر و ئهدهبی، جه هۆرامانهنه، جه شارو پاوهینه کوشیاوه و ئهدیب و شاعر
نوسهرێوه وهڵاتپارێز و نێشتیمانپهروهر، ئهویندار و سهوداسهرو وهڵاتهکهیمان، ئاشق و دڵدارهیتهرو
هۆرامانیش چهنه ئهسێمێ. دڵدارێوه به ئهوینی پاک و بێگهردش.
گردو وهرزهکانو ساڵی، پێسهو ڕابیارهی ئاشقیی، زیارهتو مهزارو پیرشالیاری وتوافو کۆساڵان و
عهوداڵان و شاهۆ و داڵانییش ویرۆنهشێ و تا گوڵمێوه وهرواوهو هانه و هانهکڵانوهۆرامانیش
نهنۆشایبیا، تاسهو تهژنهییش نهمێڕیێ.
کام کهش و کۆوکهمهر، کام دهرودهشت و دۆڵ و چیا باقێوه گوڵهچنوور و سوورهههراڵه و شهوبۆ و
بۆژانهش پۆوهبیا، وێش یاونێ لاش و به هۆرلووشای عهترو بۆیش، سهروهشبێ و باقێوهیچشان چهنه
دهسکهنه کهرێ و به شهماڵیهره، کیانێشان پهی ئهمنی دووروهڵاتیی، کۆسکهوتهی.
ههڵای باقهو سوورهههراڵهکهو لێ گولدانو سووچوو یانهکهیمان که، دهسڕن و سهوقاتو، تۆی ئازیز و
وهشهویسیهن، پێسهو یادگارێوه به نرخ و گرانبههای، که پهڕهن جه ئهوین و حهز و وهشهویسیی و
تاسهو چهمپهنهکهوتهیت و بیرهوهریێ تاڵوشیرین و کۆمهڵێوه بڕیار و بهڵێنێ ئاشکرا و شاراوێ، بهینیمان
نا وهرو چهمانمۆ، پێسهو تهبهڕکی، مهنیهوش سهروسهرهیمۆ و به ههڵسهو چهمانم، ئاویاریش مهکهرونه.
ئا ڕۆیچه که دهرفهتهو ئهوهگێڵایم پهی ئاماوهرۆ، چهنی وێم ماوروشۆ و مهنیهونهش لێ گولدانهکهو پاڵوو
کێلوو مهزارهکێت.
تهنیا دڵوهشیی و هیوام ئانهبێ، که تۆم ههنی. پهوچی خهموئازارهکانو دوورهوهڵاتیم لاتۆ باسکهرێنێ و تۆیچ
سفرهو دڵه گهورهکهیت پهیم یاویشیهره و پا شێوازه تایوهتیهو وێته، ئازارهکانم ڕفانیشی پهی وێت و هێمنتهرین
و دڵوهشکهرتهرین وشێ، که قهڵاقوچێ بێنێ جه همێد و ئاوات و ئارهزوی، دێشی دهرخواردم.
وهختارهی، هۆنیاوێ، وهرمیئاڵۆزیم نویسه پهی مامۆسا ئۆسمانی، چهنی میرزا سهعڵڵای ههجیجی کهوتانێ
پهیوهندیگرتهی و شێعر واڕالێ. وهختارێ بۆ پڕوزو جهرگیم پهی دماکۆچو غازی و یۆسفی، به چنددێڕێ
هۆنیاوێ بهربڕیێ و شێعرهو سهرو کێلوو مهزارهکهو بابهیم به تۆره کیاسه پهی خێزانهکهیمان، تۆی قاسدی نامهبهری
ڕؤح سووک، بییهی گۆچانهو دهسیمو، پردهو پهیوهندیم چهنی ئا ئازیزانه. ئهی ئیسه کێمههن هاناش پهی
بهروو، وهنهش بلاڵیهونۆ،داواش وهنهکهروو وێش بیاونۆلات و دهسکهرۆ ملتو، ماڵئاوایی و گهردهن ئازادیت
چهنه کهرۆ.
تهنیا چێوهی که ویرم چۆنهکهردهبێ، تهنانهت، گهرهکیچم نهوێ، وهرممهنه بینووش و بژنهووش، هواڵوو کۆچیی
کوتوپڕو بێماڵئاوایی تۆبێ.
باقی گیان، مهر، بڕیار نهۆێ، چهمهڕوانو ئهوهگێڵایمبی ودماو شهکهتی بهرکهردهی و دیدارو ئازیزان، یهکهمجار
بلمێ سهروو مهزارهو ئا ئازیزو وهشهویسانه که دۆس و برادهر و ڕهفێق و کهسێ ههردوینمانبێنێ و دماتهریچ
پهی بهرکهردهو حهسرهت و تاسهو ئاواتهکانمان، یۆ کۆڵهپشتیێوه کهرمێ کۆڵێمان و هوار به هوار، هانه به هانه
دهگا به دهگاو ههورامانی، ئیدیم و ئهودیم،گێڵمێ و تاسهو دهیان ساڵێ دووری و ئهرهبڕیای جه یهکترینی ، به
زیارهتوخهڵکو هۆرامانی، جه دڵمانهنه بهربارمێ. ئهی چیی جیات ئاسانێ و قورسایی بارو ئیخهمه گرانیته وس
سهرو شانانم.
مامۆسا باقی، مامۆساو کیمیاو دهبیرستانهکانو مهریوانی، تۆ سهرهت پهڕبێ جه فورمولێ شیمی و جهدوهلو مهندهلیۆفیت
جه وهربێ و قوتابییهکێچت، دڵسۆزانه پهروهردێ کهردێ، تا به ههمان شێواز، فێرو زانیاری و زانستی بانێ و خزمهتو
وهڵاتهکهیشان کهرانێ. بهڵام جه ههمانکاتهنه تۆ مرۆڤهی ههست ناسک وئهویندار و شهیداو خاک و وهڵاتهکهیت بێشی
و چرکهساتهی دۆزوگهل و نهتهوهکهیت جه ویر نهکهرد و به پاو ئیمکان و دهرهتانی، ئهوینداریی و هۆگریوێت پهی
گهل و وهڵاتهکهیت نیشانهدا.
ئا چیرۆک و حهکایهتێ که به زاوڕۆیی جه دادهسهلتهنهتێ دێدێت، ئهژنهویێبێنێت، دماتهری کهردێت به پهرتوکێوه
ڕازاوه و دیسان گێڵنایتۆ پهی زاوڕۆڵه بێنازه، بهش وریاکانو هۆرامانی. تا، ئاگادارێ ویهردهی و دابونهریتهکانشانبانێ.
چالاکانه، دژ به، وهڵاۆکهردهو ماده سڕکهرهکان، و گیرودهبیهو گهنجولاوهکان، ههڵوێست گرت و چا پهیوهندییهنه، چند
بهرههمێ شێعرێ سرنجڕاکێشێت، پێشکهشو گهنجان یا به ڕواڵهتهی تهر، دژ پا دهسهڵاتدارانه که پاڵپهشتی ئاشکرا و
شاراوهو، گیروده کهردهو گهنجانبێنێ، کهرد.
به لهفزهی شیرین و شێوازهی ڕێکوپێك، پهیلوا فهلسهفییهکێ خهییامی و دیوانهکهش گێڵناتۆ سهرو زوانی هۆرامی و
ههرپاسه، سهرقاڵوو چند کاروههرمانهی تهریبیشی، بهلام مخابن، مهرگ، مهوداش نهدای، چهنی غازی و یۆسفی،
کتێوخانهی هۆرامی دهوڵهمهندتهر کهردێ.
چنڕۆی زیاتهر، جه کۆچهدڵتهزێنه، تاقهت بهرهکهیت نهویهردهن. ههست به تهنیایی و بێدهسهڵاتی مهکهروو.
دهفتهرو نامهکانو ساڵانی ویهردهی، چهنی کۆمهڵهی جه هۆنیاوهکانت که به نامهواڕالێ کیانێمێشان پهی یهکترینی، سهرو
مێزهکهو وهرو دهسیمهنه یاواینێره و وارانو ههڵسان پلورهو ڕۆحیش جمناینانێره و وشه به وشه، دێڕبهدێڕو نامهکانت
لێ، حهوزاڵو ههڵسهکانمهنه، مهلێ مهکهرانێ. تافوو تووڕهیی وبوغزو چهمانم، گلهنییهش کهردێنانێ حهوزاڵهی مهند
نهوا وشهکێت، تهرسهو خنیکیای و نوقم بییهیشان وهنهبنیشۆ. ههر ئیسهر و ئهوسهرو یانهکهی مهکهروو، گرده
جارێ، بۆ مهنیهو بۆو باقهو سوورهههراڵهکهیۆ، که چنساڵێ چییوهڵی کیاست پهیم و پێسهو باخهوانێوه وهفاداری
به بهردهوامی، خهریکو تهڕووشک کهردهیشهنان.
باقی گیان، ئهگهردرهنگهشهوانهی، زمسانهی سهردوسڕیهنه، ڕابیارێوه، ڕهشوڕووت و سهردابهرده، سهروهنهشیویای
یانهبهکۆڵ، تۆشهبهرهی لۆبڕهی وڵوڵهش دایبۆ کۆڵێشهره و چراومووشیهی پرتهپرت کهرهش دهسۆبیه، نهوا جه وێت
بتواسنیش، ئانه ئهمنهنانێ، پهی ڕاوێژی و ڕانموونی هانام پهی ئاردێنی.
ئهگهر، شهوهی پاییزی، خشهخشو کهڵا خهزانی، جه وهرمی قووڵهنه چڵهکنایره، گۆشت جه گڤهو زلانی بیی، ههستت
کهرد ئاههنگهکه ئاشنان ووهڵتهر پێوهره گۆشداریمان کهردهن، زایهڵهو لوولهکی ئۆسا عهباسی بابهیت لێ سهرهیتهنه
زرنگیاوه، خاس بزانه، ئانه وێمهنان پهی جارو چندۆمی ئامێنان شێعرهو زایهڵهی نهی بوانونۆپهیتان، کاک تهوفێقیچ
ههست به تهنیایی و دوورهوهڵاتی کهرێ پهوچی ئادیچم ناچهنی، پێوهره ئامێنمێ پهی لایت.
وههارو هامنهنه، تهمهدارم مهوه، خهمۆکیی ڕوخساریم ، ئازارهت مهدۆ، تۆیچ تووشو خهمۆکیی و شڵهژیایی مهوی
پهوکهی ئهم سهرقاڵوو نویسهو درامایوه خهمناکیهنان.مهجالوو شهونشینی و پرێقهوهۆڕیم نیهن.
عهلیئهشرهف، هولهند
17-6-2010 بیسوپهنجو تیرو 89ی
