عهلیئهشرهف
پهنج شەممە, 15 JULY 2010 20:55 | 
گهلاوێژی ونین
چهمم بڕیهن ئاسمانی
تاسهبارو دیداریهنان
به ئێشارێ و چهمهقرتێ و وێشارالێ
مهگنوو شۆنهو ههسارێوه پرشنگداری
که، تهمهنش
درێژتهرهن جه مێژووی پهڕ جه ئازارو مرۆڤهکان
ئا مرۆڤێ، که گیرودێ، زهبروزهنگ و ئهوهچۆسیای
ملهۆڕانو مێژویهنێ
جه گرد سووچ و کهلهبهرهی ئاسمانی
سهدان ههزار یا ملیۆنان، ههسارێ جریوه جریوشانهن.
بهڵام ئێشهو، ههرچی چێوهن جیاوازهن و
وێشارالێ ئیجارهیه و ڕهقس و سهماو ههسارهکان
نا ئاسایی و پهلهپهلش پۆوه دیارهن
خۆ، ئیجاره، ئاسمانیچ
گجییه کهۆۆکهو جارانیش نهکهردهن وهر
ملوهنهکێش، نا، به ههسارێ پێکیاینۆ، نیهنه ملهنه
ڕهنگێوه تاریکه و تاره
ڕهنگهی لێڵه و ههڕاوییه،بووڵهڕهنگهی، شهوهزهنگهی
باڵش کێشان ملوو گردو زهمانیهره
خهفهتێوه جهرگبڕ و قووڵ، دهرونش گرتێنانێره
تووڕهیی و بوغز، دهسشان نیان، ئهو ناقڕهیم
چ خهوهرهن، هواڵ چێشهن؟
وهیشومهو مهرگی و قڕانی
ئیجاریچه
چهمهڕوانو ئهژنهوییهو مهرگو کێشهن؟
ئامهولوای به خێرایی و پهلهپهلوو چند ههساران
پێسهو چڵۆسکهی ئایرینێ
گرده جارێ، قهدپاڵێوه ئاسمانی، گڕئاژین کهرێنێ و
ڕووناکییێوه تهمهن کورت
تووله ڕایوه جه ملیۆنان تاریکهڕان
گیسنێنێنه و نورپژگنو دهوروبهریشان کهرێنێ
بهڵام دیسان
ئا ههساره نادییارهن و ناپێدان
چنده شهوێن، پێسهو شهوانی ویهردهی
شهوارهمهن، وهرمم زڕیان
تا دهمهو سۆح، خهوهرهنان
چهمم بڕیهن ئاسمانی، یاگه ژوانو جارانی
ههنگام به ههنگام ، گهز به گهز
به سرنج و به وردبینی
چهم مهگێڵنو، ئیپهڕ، ئهوپهڕ، پهڕانپهڕو ئاسمانی
مهونهومهلوو
شۆن و ماواو ههسارهکهی هۆرهکهرو
تهمهداری
تهمهداری، بیهن، بهشێوه ژیانیم.
وێنمانای، وێ بهروسهو ههسارهکهی، بیهن
به خهمو شهوانیم.
نیمهشهوان ههتا شهفهق
تا، ئا ساته، که تاریکی نهوهدڵانه
یاگه واڕالێ مهکهرۆ چهنی سۆحی.
یا، ئا وهخته، که جهستهی مانیا و شهکهت
پهێ، ماڵئاوایی یهکجاریی، چهنی ڕۆحی
لیانهو ژیوایش جیامازۆ
ههر تامهزرۆو دیداریهنان.
دۆعا نویسی جادوگهر، دماو وهنهو نماو عیشای
وهختهی تڵاوزهنگیانهکێش
نیای چێرو لهپو عابای.
چڕیش، سهردهسه وگزیران
فهرمانهشدا، به سهرکهردهو گرد وهزیران:
پهی پارێزنای دهسهڵاتی
به نامێ دین و ئائینی
پهرێ تهفروتونا کهردهو
میللهتهی سهرو زهمینی
که به درێژایی مێژوی،چێردهسهن و پهی ڕزگاری
سهدان ههزار ڕۆڵێ ئازایش
به سهربهرزی و فهداکاری
بهرنگارێ، پهلامارو تاڵانو داگیرکهریهنێ
به ههزاران، شار و دهگاش
خاپورێ و کاول کریاینێ
ئانه، ڕهمزو شارستانیی و ئاوهدانیی و وهڵکهوتهیهن
گرت تێکدریان.
یا به کۆڵێ، ئهسیرهکان، یا بارو ئهسپی و وشتری
واڕیانۆ پهی خهزانهو شای یا خهڵیفهی
یا کهردهنشان کۆشک و سهرا.
تهبرێز، ئهسفههان و شیراز
تاران، بهغدا تا ئهسهمووڵ
شام و بهیروت و عهنهدۆڵ
گرد دهسڕهنج و یادگار و یاگهپهنجهو
میللهتێوهن
که، بێبهشهن، جه گرد مافێوه ئینسانی و گوزهرانیوه
ئاسایی.
کهمتاری پیر به لوورهلوور
دماو وهنهو نماو قهزای
دهسش کهردۆ به بۆڵهبۆڵ، گا، به گروای، ساتهی سههوهن
گاههی توڕه و ساتهی ئههوهن.
عابا و مێزهره فڕهدێ، یهخێ وێش دڕێ تا واری
ئیسلام. نا جه خهتهرهنه
کوفر و تهماع، سهرشان هۆردان
مهملهکهتی ئیسلامیمان، کهوتهن دهسو خێڵو کوردان.
دز و جهردهو دژهشۆڕش
پیلانێشان نای دهسهوه
شهرعهن، واجبهن ههم ڕهوان
جه ههر چواردهورو وهڵاتی
پێکهاتهو شاری و دێهاتی
بگندێرا.
بێ ماتڵی، به بێ درهنگ
ڕا گێردێ وهر، فهرسهنگ، فهرسهنگ.
زمین و ههوا و دهریاره
به تهیاره و تۆپ و تفهنگ
به گورز و شمشێر و قهڵخان
پهلامار و هێرش و جهنگ.
جههادهن! و جهنگ و غهزا
ئاگادار ویاوهرتانبۆ، جهددی گهورهم ئیمام ڕهزا
دهسکهوت و ماڵ و غهنیمهت
تڵا و نوقره و جهواهێرات، ئانه ئهسبابو ژیوایهن
حهڵاڵتانبۆ، گهواراتان.
ئهوهمهنهی دهسهڵاتی، پارێزگاری ئائینیمان
بهرنگاری جه دینیمان، ئهرکو سهرو شانهیتانهن
بئنیش واردۆ، نهختهی سیاوه
نهما تهزبێح و مۆرهکهیش
جارێوهتهر، مازڵۆخهکهش ههم یاواره
چڕچ و لۆچو سهریش ساف کهرد
چند ڕکاتهی نماش وهنه
جارهێ تهری دهسش کهردۆ به ورد وهنهی
گهوره گزیر، لوا وهرۆ، دهسش ماچکهرد
چێوهیش چفنا گۆشیشهره
خوتبهکهش کهرد به فهرمانه
نامێ خودایش نیا سهرشۆ.
گێڵاوه لاو ئهفسهره پایه بهرزهکان
تهنیا، ئا وهخت، نا، تهمامیی
کوردستانیتان وس چێرو سهیتهرهیتان
تهنیا ئا زهمان، پهیتان ههن
بسیهیدێوه، پوتینهکانتان
بهرباردێ
*****
چهمم وسهن ئاسمانی
دونیا سوورهن، زهمین سوور و ئاسمان سوور
سوورتهر جه ڕهنگهو شهفهقی
دهمهو سۆحهن.
ونی موارۆ.
ئاسمان ههڵسیی مهمجۆره وههوره ترێشقه
به ناڵهناڵ
گۆشو گهردونیش کهڕ کهردهن.
بزوسکانی ، چهخماخانی
لێفهشڕه وڵوڵهکهو ئاسمانی
کهوتهن تکه!خوڕهو وارانو ونێ مهی.
پلورێ گرد کهوتێنێڕا، ئیجاریچ لافاوه هۆرزا
سهدان گهنجێ، دریای داری
ههسارهو دهمهو سۆحیشان کێشا واری
گهلاوێژی وناڵینشان کێشا داری
گهلاوێژی وناڵینشان،کێشا واری
عهلیئهشرهف ، گهلاوێژو 2009 ی – هولهند
