سه‌یاد وه‌سێش بؤ ! شه‌نیه‌ر خه‌رپانه‌یی

سه‌یاد ! وه‌هارا .. که‌ش و کؤ ڕه‌نگین
به‌قێ موانا ، وه‌شا به‌ق جه‌نگین
جه‌لاو تۆ تفه‌نگ .. ته‌قه‌و زرمه‌ش مێ
وه‌هار شێونی ، وه‌هار ناڵه‌ش مێ
قایمت که‌رده‌ن جاگه‌ و هه‌رمانێت
کاشکی کاول بۆ ده‌زگاو دوکانت !
تۆ حه‌شارت دان ، به‌قێ وه‌ش ئاواز
سه‌دا پێ مدۆ .. وه‌ش به‌ خه‌مزه‌و ناز
خاڵ خاڵو ره‌نگین ئامێ کۆ بیێ
چه‌مه‌و ده‌شته‌ و که‌ش .. به‌ ده‌نگێ بیێ
سه‌یاد نه‌مه‌نی .. په‌ی وێتو کاریت
په‌ی په‌نجێ به‌دیت .. په‌ی مه‌ژگی هاریت
په‌نجه‌ت ماچش که‌رد ماشه‌و تفه‌نگی
سه‌وزی وه‌هاری سور بی به‌ونی
وه‌شیشه‌که‌ش کامه‌ن ! چکؤن تامو چیژ؟
کارێ که‌ که‌ردت ، به‌دبی تفه‌نگ چیش
سه‌باحی ساڵحان تاکو نیمه‌ڕۆ
هاره‌قت مت و کیلوێت ئاوردۆ
قسێ زل زلێ جه‌ شه‌و نشینینه‌
مه‌ژگت وسته‌ره‌ وه‌سێن بوینه‌
به‌ مشتێ ساچمێ به‌قێوه‌ت کوشته‌ن
ده‌سا که‌م واچه‌ هه‌نم ده‌سو تفه‌نگ
بؤ ده‌سش بازمێ راو شکاری
وێ ده‌یمێ ده‌سو وه‌شی وه‌هاری
ته‌ماشا که‌رمێ کۆگاو نسارا
به‌قێ وه‌ش ئاواز ئاوازی وانا
بلمێ ده‌ره‌ره‌ گه‌شتێوه‌ که‌رمێ
خه‌مو خه‌فه‌تو دڵا راو که‌رمێ
هه‌ر چنه‌ که‌رمێش ته‌ماشاو ده‌ره‌ی
خه‌مێ لانریا ، مه‌ستیچ مدۆسه‌ره‌یی
رۆژگارو ده‌گای پاسه‌ که‌ ویه‌رؤ
وه‌شیش چۆرێوه‌ن سه‌د ڕاوێ مارؤ
به‌هه‌شتا ، عشقا ، رۆژگاره‌که‌ش
کۆمه‌ڵ به‌سمێنه‌ جه‌ شه‌و گاره‌که‌ش
ده‌سه‌و کناچاو قۆریو پیاڵه‌شا
قێڕه‌ و زاڕۆڵاو زیڕه‌ و خه‌نده‌شا
نشینگه‌ و وێما گه‌رما ناڵه‌ما
سڵام نشینگه‌ هاوار چن وه‌شا
ده‌س په‌نه‌ که‌رمێ گه‌مه‌و گۆره‌وا
خاتون نازارێ چایی گێڵنا
تا شه‌و گاری دره‌نگ هه‌ر به‌زم و ڕه‌زما
نه‌مه‌نه‌ی به‌زمی ، هێرشا وه‌رما
با چۆڵش که‌رمێ نشینگه‌ و شه‌وێ
ئاوه‌دان بۆنه‌ په‌ی شه‌وێ ته‌رێ
سه‌یاد به‌زه‌یێ ، چانه‌ی وه‌شته‌ر هه‌ن
سه‌بای زووه‌نه‌ ، دلێ یاگانا ، ده‌نگو به‌قا هه‌ن !!